ᐁᐯ-ᒥᓐᓇ ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᖓ ᐊᑐᐃᓐᓇᖅ ᐃᓕᓐᓂᐊᑎᓂᒃ ᐃᓕᓐᓂᐊᑎᑦᓯᒍᑎᐅᑎᓪᓗᒍ ᐃᓄᒃᑎᑐᑦ ᓇᕿᑦᑕᓂᕐᒥᒃ. ᐁᐯ ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᒃ ᐃᓕᓐᓂᐊᑎᑦᓯᓲᖅ ᐊᑐᕐᑕᐅᓲᓕᒫᓂᒃ ᓄᓇᕕᒻᒥᐅᑎᑐᑦ ᐃᓄᒃᑎᑐᑦ 34-ᓂᒃ ᐃᓕᓐᓂᐊᑎᑦᓯᒍᑎᖃᕐᓱᓂ ᑐᖓᓕᕇᓂᒃ, ᐅᖃᐅᓯᕐᓄᑦ ᐱᒋᐅᕐᓴᐅᑎᖃᕐᓱᓂ ᑕᒫᖕᖓᑐᐃᓐᓇᖅ ᓂᕈᐊᕐᑕᐅᔪᓂᒃ ᓱᑲᓕᐅᑎᓂᕐᓂᓗ ᐊᓯᖏᑦᑕ ᓱᑲᓐᓂᕕᓂᖏᓐᓂᒃ ᖄᖏᐅᑎᒐᓱᑦᓱᑎᒃ.
ᓄᓇᕕᒃ ᑯᐯᑉ ᐅᑭᐅᕐᑕᑐᖓᓃᑦᑐᖅ ᓄᓇᖕᖑᐊᑎᒍᑦ ᐃᑳᖓᔪᖓᓂ 55 ᖁᓛᓂ. ᐃᓄᖃᕐᓱᓂ 11,627-ᓂᒃ (2006-ᒥ ᑭᓯᑦᓯᒍᑎᕕᓃᑦ), 90%-ᖏᑦ ᐃᓄᑐᐃᓐᓇᐅᑎᓪᓗᒋᑦ. ᓄᓇᕕᒃ ᑐᑭᓕᒃ "ᓄᓇᖃᕐᕕᓴᖅ" ᐃᓄᒃᑎᑐᑦ ᐅᖃᐅᓯᖏᑎᒍᑦ. ᐃᓄᐃᑦ ᓄᓇᓕᓕᒫᖏᓐᓂᒥᐅᑦ ᓄᓇᕕᒻᒥᐅᖑᓂᕋᕐᑐᑦ.
ᐊᑐᕈᓐᓇᖁᑎᑦ. ᐁᐯ-ᑎᑐᑦ ᐃᓕᓐᓂᐊᑎᑦᓯᒍᑎᒃ ᖃᕆᑕᐅᔭᒃᑯᑦ ᐋᕐᕿᓱᕐᑕᐅᓯᒪᒐᓗᐊᕐᑎᓗᒍ ᐃᓕᓐᓂᐊᑎᓅᓕᖓᑎᓪᓗᒍ ᓄᓇᕕᒻᒥᐅᓄᑦ, ᑭᓇᒃᑯᓕᒫᑦ ᐊᑐᕈᓐᓇᓯᐊᕐᑐᑦ. ᐁᐯ-ᒥᒃ ᖃᕆᑕᐅᔭᒃᑯᑦ ᐊᑐᕈᒪᒍᕕᑦ ᐊᑐᕈᓐᓇᑐᑎᑦ ᐳᓛᕆᐊᕐᓯᒪᔪᕐᑎᑐᑦ. ᖃᐅᔨᒪᒍᒪᑐᐊᕈᕕᓘᓐᓃᑦ ᐱᕙᓪᓕᐊᓂᕐᓂᐅᕕᑦ, ᐊᑐᖃᑦᑕᕋᑦᓴᓕᐅᒍᓐᓇᑐᑎᑦ ᐊᑎᑖᕐᓗᑎᑦ ᑐᕐᖁᕈᑎᑖᕐᓗᑎᓗ.
ᖃᕆᑕᐅᔭᕈᑎᖓ ᐁᐯᑉ ᐊᑭᖃᖕᖏᑐᖅ ᐊᑐᕐᑕᐅᓗᓂ ᐃᓕᓐᓂᐊᕈᑎᒋᓗᒍ ᐃᓄᒃᑎᑐᑦ ᓇᕿᑦᑕᕆᐅᕐᓴᓂᕐᒥᒃ ᓄᓇᕕᒻᒥᐅᑎᑐᑦ. ᑌᒣᒐᓗᐊᕐᑎᓗᒍ, ᐊᑦᔨᓕᐊᕆᔭᐅᕐᖃᔭᖕᖏᑐᖅ, ᐱᖕᖑᑎᑕᐅᒋᐊᓪᓚᖃᔭᖕᖏᑐᖅ, ᓂᐅᕐᕈᑎᒋᔭᐅᕐᖃᔭᖕᖏᑐᖅ, ᐅᖃᐅᓯᐅᑉ ᐁᑉᐹᓅᔦᕕᐅᒋᐊᖃᖕᖏᑐᖅ ᐋᕐᕿᒋᐊᕐᑕᐅᓗᓂᓘᓐᓃᑦ ᐁᐯᑉ ᖃᕆᑕᐅᔭᕈᑎᖓ ᖃᓄᕐᓘᓃᑦ. ᓄᓇᕕᒻᒥᐅᖑᖕᖏᑐᓄᑦ ᐃᓕᓐᓂᐊᑎᓄᑦ ᐱᓪᓗᑯᒋᐊᓕᓕᕆᓂᒃᑯᑦ ᐃᑲᔪᕐᓯᒪᐅᑎᖃᕐᑎᓯᓲᖑᖕᖏᒥᔪᒍᑦ.
ᖃᓄᐃᓕᒋᐊᕈᑎᐅᖁᔭᑎᑦ ᐊᓪᓚᓯᒪᔪᕐᑖᑎᒍᒪᔭᑎᓘᓐᓃᑦ ᐊᑐᐃᓐᓇᐅᕕᒋᑦᓯᐊᑕᕗᑦ. ᐊᓪᓚᓯᒪᔪᒥᒃ ᐁᐯ-ᒧᑦ ᐃᓚᒋᐊᕆᒍᑎᒋᒍᒪᔭᑎᓐᓂᒃ ᑕᑯᒍᒪᓐᓂᕈᕕᑦ ᐊᐅᓪᓚᑎᑦᓯᒍᓐᓇᑐᑎᑦ ᐅᕙᑦᑎᓄᑦ. ᐅᖄᕕᖃᕐᓂᖅ ᐅᕙᑦᑎᓂᒃ-ᒨᕐᓗᑎᑦ. ᓱᕐᖁᐃᓯᒪᑎᑦᓯᖃᔭᖕᖏᑐᒍᑦ ᐊᓪᓚᑕᕕᓂᑎᓐᓂᒃ ᐃᓚᒋᐊᕐᑎᓯᒐᔭᕐᒪᖔᑦᑕ ᑭᓯᐊᓂ ᐆᑦᑐᕋᒐᔭᕐᑐᒍᑦ ᑌᒣᒍᓐᓇᐸᑦ.
ᐁᐯᑉ ᖃᕆᑕᐅᔭᒃᑯᑦ ᐃᓕᓐᓂᐊᑎᑦᓯᒍᑎᒃ ᐱᖕᖑᑎᑕᐅᓚᕿᓯᒪᔪᖅ ᑮᓇᐅᔭᖃᕐᑎᑕᐅᓂᕐᒥᓄᑦ ᐃᓕᓐᓂᐊᓂᕐᒧᑦ ᓄᑖᓂᒃ ᐊᕐᖁᓯᐅᕐᓂᑯᓐᓄᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᓗ. ᐃᓄᒃᑎᑑᕐᓂᖏᑦ ᖃᕆᑕᐅᔭᒃᑯᑦ ᐊᑐᐃᓐᓇᖃᕐᕕᖓᓂ ᐁᐯᑉ ᓇᕿᑦᑕᕆᐅᕐᓴᐅᑎᖏᓐᓂᒃ ᐁᐯᑉ ᐱᓯᒪᔪᑦ, ᓯᕗᓪᓕᒥ ᐊᑐᕐᑕᐅᖃᑦᑕᓯᒪᔪᖅ ᐁᐯᒥ ᖃᕆᑕᐅᔭᓄᑦ ᐱᑐᖃᐅᓂᕐᓴᓄᑦ Macintosh-ᓄᑦ ᑭᓯᐊᓂ ᐊᑐᕐᑕᐅᒍᓐᓇᖃᑦᑕᓯᒪᔪᖅ. ᐃᓕᓐᓂᐊᕈᑎᑦᓴᓕᐅᕐᑏᑦ ᐱᓪᓗᑯᒋᐊᓕᓕᕆᔩᓪᓗ ᐱᓇᓱᖃᑎᒌᒋᐊᖃᕐᓯᒪᔪᑦ IXMedia-ᓄᑦ ᐱᓪᓗᑯᒋᐊᓕᓕᕆᓂᕐᓂᓗ ᖃᕆᑕᐅᔭᓂ ᐱᓇᓱᖃᑎᒌᒍᑎᖃᕐᓱᑎᒃ.